सुरुङमार्गको मर्मत सम्पन्न भएपछि मेलम्ची खानेपानी आयोजनाबाट काठमाडौं उपत्यकामा पानी वितरण आजदेखि पुनः सुचारु भएको छ। काठमाडौं उपत्यका खानेपानी लिमिटेडका अनुसार प्रारम्भिक चरणमा दैनिक १७ करोड लिटर पानी वितरण गरिनेछ।
पानी अभावका कारण पछिल्ला तीन हप्ता उपत्यकाका बासिन्दा ट्याङ्करमा निर्भर हुनुपरेको थियो। अब नियमित तालिकाअनुसार धारामा पानी आउने खानेपानी लिमिटेडले जनाएको छ।
अधिकारीहरूले वर्षायाममा हुन सक्ने क्षति रोक्न मुहान क्षेत्रमा थप संरचना निर्माण गरिने बताएका छन्। उपभोक्तालाई पानी सदुपयोग गर्न पनि आग्रह गरिएको छ।
