नेपाल राष्ट्र बैंकले मौद्रिक नीतिको समीक्षा गर्दै नीतिगत ब्याजदर आधा प्रतिशत बिन्दुले घटाउने निर्णय गरेको छ। बैंकले बजारमा तरलता पर्याप्त रहेको र मूल्यवृद्धि नियन्त्रणमा रहेको जनाएको छ।
ब्याजदर घटेपछि वाणिज्य बैंकहरूले कर्जाको ब्याजदर पनि क्रमशः घटाउने अपेक्षा गरिएको छ। यसले उद्योग, व्यवसाय र आवास कर्जाको लागत कम गर्ने अर्थशास्त्रीहरूको भनाइ छ।
निजी क्षेत्रले निर्णयको स्वागत गर्दै लगानी बढ्ने विश्वास व्यक्त गरेको छ। तर कर्जा प्रवाह बढाउन बैंकहरूले ब्याजदरको सुविधा उपभोक्तासम्म पुर्याउनुपर्ने विज्ञहरू बताउँछन्।
